Тренерот на Милан, Серџо Консеисао, призна дека чувствува зголемен притисок врз себе, особено по поразот од Болоња во одложениот натпревар од деветтото коло во Серија А. Сепак, тој вети дека ќе продолжи да работи со иста страст и посветеност, освен ако клубот не донесе поинаква одлука.
Сезоната на Милан е на работ на колапс, по испаѓањето од Лигата на шампионите и двата последовни порази во Серија А, кои ги оставија на осмата позиција во табелата. Тимот е на осум бода зад Јувентус, кој го држи последното место што води во Лигата на шампионите, а до крајот остануваат 12 натпревари.
Милан синоќа загуби со 1-2, но Консеисао останува оптимист дека тимот може да избори место во европските купови.
„Сè уште е во наши раце. Ако клубот смета дека не сум вистинскиот човек за оваа работа, ќе си заминам. Но, додека тоа не се случи, ќе продолжам да работам со иста страст како и секогаш“, изјави Консеисао.
„Во моментов работиме напорно, сите сме посветени, но резултатите не доаѓаат, што е разочарувачки. Над Милан како да се надвиснал облак, од кој можеме да излеземе само со победи, бидејќи резултатите се тие што прават разлика.“
Тој исто така смета дека критиките кон него се неоправдани и дека не е единствениот виновник за состојбата на тимот.
„Ако повеќе не сум потребен, ќе си заминам без да барам ниту едно евро. Имам околу 100 натпревари во Лигата на шампионите и освоени 13 трофеи. Постојат тренери кои немаат ниту еден, а добиваат огромна толеранција. Некои луѓе ги паметат моите успеси, но има и такви што зборуваат со злоба. Имам семејство и соседи кои гледаат што се случува, и тоа не е фер“, заврши португалскиот стратег.
