Тиквеш стигна до првиот пехар во клупската историја, откако го освои Купот на Македонија со триумфот над Воска (2-1), а тоа цело Кавадарци знаеше да го прослави на вистински начин. Немаше спиење синоќа во овој град, сите излегоа на улиците да ги пречекаат своите херои и заедно со нив да го прослават големиот успех.
Се пееше и се скандираше до раните утрински часови, сето тоа разубавено со чадни бомби и факели.
Тиквеш со триумфот во Купот обезбеди и прв историски пласман во европските купови. Тимот на Ѓорѓи Мојсов ќе игра во квалификациите за Конференциската лига.
