Барселона и Интер одиграа еден од најдобрите двомечи во историјата на нокаут фазата од Лигата на шампионите. Двата натпревари завршија со идентичен резултат 3-3, а во продолженијата Интер успеа да постигне уште еден гол и да се пласира во финалето.
По натпреварот во фокусот беше и полскиот судија Шимон Марчињак.
Каталонските медиуми потсетуваат дека неговиот однос со Реал Мадрид е „пријателски“, а објавија и видео на кое во соблекувалната има торба со грб на кралскиот клуб.
Марчињак досудил поништување на пенал за напаѓачот на Атлетико Мадрид, Хулијан Алварез, во осминафиналето на годинашната Лига на шампиони, во корист на Реал.
Шпанскиот медиум „Мундо Депортиво“, како и тренерот и играчите на Барселона, тврдат дека Марчињак судел во корист на Интер.
„Секогаш кога имаше спорна ситуација, Полјакот и неговите ВАР помошници пресудија во корист на Интер. Марчињак, кој има пријателско минато со Реал Мадрид, ѝ наштети на Барса со своите асистенти“, пишува „Мундо Депортиво“.
Тренерот на Барселона, Ханси Флик, изјави по натпреварот дека Марчињак секоја спорна одлука ја пресудил во корист на Интер, а со него се согласија и играчите на Барса, Ињиго Мартинез и Педри.
Но, ништо нема да се промени – Интер ќе го игра финалето од Лигата на шампионите на 31 мај во Минхен.
