Јувентус е во најголемата резултатска криза во последните десет години. Иако не е одиграна ниту половина од сезоната во Серија А, „старата дама“ е далеку од освојување на Скудетото, а под знак прашалник е и квалитетот на играчкиот кадар на Масимилијано Алегри.
Италијанските медиуми го објавија списокот на играчи на кои нема да сметаат во Јувентус по зимската пауза и кои практично се наоѓаат на трансфер листата. Целта е да се растовари буџетот и да се соберат пари со нивна продажба за да може да се инвестира во играчи кои треба да донесат нов квалитет.
Отпишани се Дејан Кулушевски, Адриен Рабио, Арон Ремзи и Артур Мело. Тоа се играчи кои навистина не се вклопуваат во системот на Алегри.
Ремзи и Артур практично не играат, додека Рабио добива можност, пред се поради послабата конкуренција. Кулушевски кој беше платен дури 35 милиони евра не ја оправда инвестицијата и почна да игра благодарение на повредата на Федерико Киеза.
Јувентус заостанува 12 бода од првото место и сега дури и пласманот во Лигата на шампионите на крајот од сезоната може да се смета за успех.
