Јувентус со победа ја започна новата сезона во Серија А, совладувајќи ја Парма со 2-0 во Торино. „Бјанконерите“ ја решија дилемата во второто полувреме, на радост на своите навивачи.
Дебитантот Џонатан Дејвид го отвори резултатот во 59. минута, откако претходно Јилдиз и Консеисао пропуштија големи шанси. Канаѓанецот, кој летово пристигна од Лил, се впиша меѓу стрелците уште на својот прв официјален настап.
Иако Јуве остана со играч помалку по исклучувањето на Консеисао, тимот на Игор Тудор веднаш одговори со брза контра. Кенан Јилдиз мајсторски му асистираше на Душан Влаховиќ, кој од непосредна близина ја затресе мрежата за конечни 2-0.
Со овој триумф Јувентус најави силен старт на сезоната. Во второто коло „бјанконерите“ ќе гостуваат кај Џенова, додека Парма ќе ја пречека Аталанта.
„Бергамаските“ пак, не успеаја да слават на првиот меч – одиграа 1-1 против новиот калчолигаш Пиза на домашен терен.
