Кристијан Киву е на чекор од назначување за нов тренер на Интер. Романскиот стратег синоќа се сретна со раководството на клубот, а разговорите, според извори од Италија, поминале во позитивна атмосфера. Се очекува Киву денес официјално да стави потпис на договор со важност од две години.
Поранешниот дефанзивец на „нерoаѕурите“ беше забележан на балконот од хотел во центарот на Милано заедно со спортскиот директор Дарио Бачин. Подоцна од истиот хотел излегоа и претседателот на клубот, Бепе Марота и Пјеро Аузилио.
Интер реши да му ја довери клупата на Киву откако Симоне Инѕаги ја прифати богатата понуда од Ал-Хилал. Прв избор на раководството беше Цеск Фабрегас, но клубот Комо одби да го ослободи Шпанецот.
Меѓу опциите бил и Патрик Виеира од Џенова, но Киву добил предност поради две клучни причини: слободен е на пазарот по краткотрајната авантура со Парма и има длабока поврзаност со клубот. Киву беше дел од тимот на Интер кој ја освои тројната круна во 2010 година, а потоа долги години работеше во младинските категории на клубот.
Потпишувањето на договорот се очекува денес во клупските простории, а договорот ќе биде вреден околу 1,5 милиони евра по сезона.
