Голема семејна драма доживува играчот од средниот ред на Борусија Дортмунд, Марсел Сабицер. Австриецот беше големиот херој во победата од 4-2 над Атлетико Мадрид во реваншот од четвртфиналето на Лигата на шампионите. Токму тој го одведе својот тим во полуфиналето откако го постигна четвртиот гол, а претходно имаше и две асистенции.
По неговиот гол, Марсел ги крена рацете кон небото, што многумина го протолкуваа како негов начин на славење. Само неколку дена по натпреварот стана јасно дека тоа е почит кон неговиот посинок Лукас. Тој си го одзел животот на 24 март, кратко откако наполнил 18 години. Според членовите на семејството, причината е скршено срце и невозвратена љубов.
Сабицер на својот Инстаграм објави фотографија од неговиот гест, а неговата сакана Катја Куне искоментира: „За Лукас“.
Тинејџерот е дете од нејзината претходна врска и живеел одвоено од мајка си и полубратот. Русокосата убавица е од Украина, но од мала живее во Германија, каде што во 2014 година го освои срцето на „The Bachelor“.
Катја е девет години повозрасна од Марсел, двајцата се заедно од 2017 година, а три години подоцна се верија. Во 2019 година, тие станаа родители на ќерката Мери Лу.
