Англискиот напаѓач Хари Кејн го сумираше настапот на тимот во квалификацискиот натпревар за ЕП 2024 против Македонија (1-1).
„Знаевме дека ќе биде тежок натпревар против квалитетен тим кој игра на терен на кој е тешко да се игра нашиот стил на игра. Во дел од натпреварот губевме со 0-1 поради спорен пенал. Беше убаво да се биде на теренот бидејќи секогаш се трудам да му помогнам на тимот, без разлика дали играм 90 минути или 10 минути. Нам ни беше важно да израмниме – штета што не можевме да постигнеме втор гол. Мислам дека тоа беше автогол, прилично сум сигурен. Ако некој требаше да го даде вториот гол, тоа ќе бевме ние“, изјави капитенот Хари Кејн.
Тој вели дека Македонија е квалитетна селекција.
„На натпреварот против Малта бевме невнимателни со топката, а овојпат имавме мала грешка при контранапад и контроверзен пенал. Игравме со репрезентација од која се очекуваше да ја победиме со 5-0 или 6-0, но тие направија добра работа да ја елиминираат Италија во баражот за Светското првенство. Можеме да бидеме навистина горди на начинот на кој го водевме квалификацискиот циклус“, изјави Кејн.
На конечниот пласман во групата, Англија го зазеде првото место со 20 бода, а Македонија остана на четвртата позиција со 8 бода. Италија се пласираше на ЕВРО 2024 од второто место со 14 бода, колку што има и Украина на третото место.
