Тренерот на Барселона, Ханси Флик, имаше измешани чувства по драматичното реми против Атлетико Мадрид (4-4) во првиот полуфинален дуел од Купот на кралот. Каталонците направија пресврт по лошиот почеток и водеа со 4-2 до последните минути, но ја испуштија победата.
„Разочаран сум од резултатот поради начинот на кој заигравме откако примивме два гола на почетокот. Создадовме многу шанси. Во последните неколку минути дозволивме да се случат премногу опасни ситуации. Атлетико е многу силен тим“, изјави Флик.
„Имавме големи шанси да победиме. Треба да ги анализираме грешките што ги направивме во одбраната. Се надевам дека ќе ги поправиме. Ние сме млад тим и сигурно допрва ќе напредуваме“, нагласи германскиот стратег.
„Можеме да победиме во Мадрид. Доминиравме 70 минути, но на крајот дозволивме да бидеме под притисок. Не ми се допадна како реагиравме при последниот гол. Сепак, задоволен сум од формата на повеќето играчи и сигурен сум дека сме на вистинскиот пат“, додаде Ханси Флик.
