Во Манчестер Сити се загрижени за состојбата на Ерлинг Халанд, откако Норвежанецот го напушти „Виталити“ стадионот со патерици и со заштитна чизма на ногата по вчерашната победа од 1-2 на неговиот тим против Борнмут во четвртфиналето од ФА купот.
Напаѓачот беше заменет во вториот дел од натпреварот, по околу еден час игра, кога на негово место влезе Омар Мармуш, откако очигледно заработи повреда на левата нога по дуел со Луис Кук.
Халанд се обиде да продолжи да игра, но болката не му дозволи, па Пеп Гвардиола го повлече од игра. Очекувањата се денес или најдоцна утре, откако ќе се намали првичниот оток, да направи дополнителни медицински прегледи за да се утврди неговата состојба.
По натпреварот, Гвардиола изјави дека сè уште не е јасна состојбата на играчот и дека ќе треба да се почека за повеќе информации за повредата и можниот период на отсуство. Ова го става под сериозен знак прашалник учеството на Халанд во претстојниот натпревар на „граѓаните“ в среда против Лестер и во градското дерби со Манчестер Јунајтед во недела.
