Дербито меѓу Манчестер Јунајтед и Манчестер Сити е во фокусот на денешната програма во Премиер – лигата. Тоа ќе биде 500. натпревар за Пеп Гвардиола во најдобрите европски лиги и 245-ти на чело на Сити.
„Црвените ѓаволи“ одамна не биле во толку добра форма пред оваа дерби пресметка и дури се во подобра резултатска серија, иако се надеваат дека ќе избегнат четврти последовен пораз од „граѓаните“ на „Олд Трафорд“.
Само четири бода го делат тимот на Ерик тен Хаг од оној на Хосеп Гвардиола на табелата, а сигурно исходот од натпреварот ќе има сериозно влијание врз распределбата на првите позиции. Арсенал љубоморно го чува врвот, а Сити мора да победи за да го одржи чекорот.
Домаќините немаат пораз на „Олд Трафорд“ веќе седум последовни кола (шест победи и едно реми), а таа серија вклучува победи над Тотенхем и над Арсенал. Одбраната на Ерик тен Хаг нема примено гол речиси пет часа.
Манчестер Сити ќе треба да го преброди шокантниот пораз од Саутемптон со 2-0 во Лига купот и да брка пет бода негатива во однос на лидерот Арсенал. „Граѓаните“ во октомври го совладаа градскиот ривал со 6-3 и сега ќе се обидат да ја продолжат гол-фиестата.
Маркус Рашфорд и Ерлинг Халанд се најдобрите стрелци за двата гиганти и најголеми адути на Тен Хаг и на Гвардиола.
