Манчестер Сити го декласира Лидс Јунајтед на „Итихад“ со 7-0 и се зацврсти на првата позиција на табелата во Премиер – лигата со 41 бод. Тимот на Пеп Гвардиола одигра неверојатен меч, постигна седум гола, а можеше веројатно да стигне и до двоцифрена бројка.
Фил Фоден го отвори резултатот, а Џек Грилиш и Кевин де Бруин до крајот на првиот дел зголемија на 3-0 и го решија прашањето на победникот.
Но, „граѓаните“ не застанаа и во второто полувреме. Ријад Махрез зголеми на 4-0, Де Бруин постигна прекрасен гол кој беше петти по ред во мрежата на Мелие, а до крајот стрелаа и дефанзивците Џон Стоунс и Натан Аке.
Астон Вила на гости го совлада Норич со 0-2, со головите на Џејкоб Рамси и на Оли Воткинс.
