Украинските фудбалери не можат мирно да набљудуваат што се случува во нивната татковина. Некои од нив деновиве објавуваат на Инстаграм, апелираат за мир и изразуваат пораки за поддршка до своите сонародници.
Порака по повод почетокот на руската инвазија испратија и легендарниот Андриј Шевченко, Олександр Зинченко од Манчестер Сити и Андриј Јармоленко од Вест Хем.
Последен одговори Георги Бушчан, голманот на Динамо Киев и на репрезентацијата на Украина. Тој напиша емотивна објава на Инстаграм во која експлицитно не ги спомена рускиот претседател Владимир Путин и нивната војска, но очигледно алудираше на нив велејќи дека „никој нема право да го негира долгиот пат што го помина Украина за да ја добие својата државност“.
Еве ја целата објава на Бушчан:
„Верувам во нашата земја, нашата армија и нашиот украински народ! Сега сите мора да се обединиме пред најсериозниот предизвик во модерната историја на Украина.
Тоа не се само зборови, тоа го чувствувам кога на стадионот се свири химната на Украина и на трибините жолто-сини знамиња: гордост за нашата земја, гордост за нашата независност и нашиот народ. Украина помина долг пат во стекнувањето на својата државност и никој нема право да го негира тоа.
Огромна почит кон нашите војници, кон сите Украинци кои ги бранат границите на нашата земја, нејзината независност и правото на избор на иднината.
Украина е пред се!“
