Фудбалерите на Фламенго обезбедија место во финалето на Интерконтиненталниот куп, откако синоќа во полуфиналниот дуел во Ал Рајан го совладаа египетскиот Пирамидс со 2-0.
Актуелниот шампион на Јужна Америка и Бразил на 17 декември ќе се бори за трофејот против европскиот првак Пари Сен Жермен, кој директно избори пласман во финалето на ова натпреварување.
Головите за Фламенго на мечот против Пирамидс, предводен од клупата од хрватскиот стратег Крунослав Јурчиќ, ги постигнаа Лео Переира во 24. и Данило во 62. минута.
Двата погодоци беа реализирани по прекини.
Фламенго во среда ќе има можност да го освои и третиот значаен трофеј за помалку од еден месец, но за да го постигне тоа ќе мора да го совлада најтешкиот можен противник, шампионот на Европа, ПСЖ.
