Фенербахче и Жозе Мурињо официјално ставија крај на својата соработка, објави клубот од Истанбул. Главната причина за разделбата е елиминацијата во плејофот за Лигата на шампионите против Бенфика – португалскиот тим победи со вкупни 1-0 и ги остави „жолтите канаринци“ без пласман во најпрестижното европско натпреварување.
Амбициите на управата беа Фенербахче да игра во групната фаза на ЛШ, но наместо тоа клубот ќе мора да се задоволи со настап во Лига Европа. Дополнително, Мурињо минатата сезона не успеа да ја донесе посакуваната титула во Суперлигата, која заврши во рацете на големиот ривал Галатасарај.
„Се разделивме со Жозе Мурињо, кој беше тренер нa тимот од сезоната 2024/25. Му благодариме за вложениот труд и му посакуваме успех во следните предизвици“, стои во соопштението на клубот.
Во 62 натпревари како тренер на Фенербахче, Португалецот оствари 37 победи, 14 ремија и 11 порази.
