Капитенот на фудбалската репрезентација на Македонија, Енис Барди, е блиску до решавање на компликуваната ситуација во Трабзонспор, каде што подолг период беше надвор од плановите на клубот.
29-годишниот играч не учествуваше на последните седум натпревари, бидејќи заедно со неколку соиграчи беше „суспендиран“ од тимот. Фудбалерите добија известување дека не се дел од идните планови на клубот, но нивните тековни договори претставуваа пречка за заминување.
Сепак, најновите информации покажуваат дека тренерот Шенол Ѓунеш ги информирал засегнатите играчи, вклучувајќи го и Барди, дека можат слободно да си бараат нови клубови. Покрај него, оваа одлука се однесува на уште четири до пет играчи.
Барди оваа сезона запиша само осум настапи во турската Суперлига. Тој пристигна во Трабзонспор во 2022 година од шпанскиот Леванте, каде што имаше значајна улога во тимот.
Оваа разврска му отвора врата на Барди за нова етапа во кариерата, каде што ќе може повторно да го демонстрира својот талент и квалитет на теренот.
