Во вистински спектакл со седум голови, Белгија ја оствари својата прва победа во квалификациите за СП 2026, совладувајќи ја селекцијата на Велс со 4-3 пред полни трибини во Брисел. Мечот понуди сè – голови, пресврти, пенали и ВАР контроверзии.
„Црвените ѓаволи“ почнаа фуриозно и уште во првите 27 минути поведоа со 3-0. Лукаку го отвори резултатот од белата точка, по што следеа маестрални погодоци на Тилеманс и Доку. Сè изгледаше како рутинска вечер за избраниците на Руди Гарсија.
Но, Велс не се предаде. Хари Вилсон намали од пенал пред полувремето (3-1), а тоа беше само најава за вистинска бура во вториот дел. Со головите на Томас и Џонсон, гостите сензационално израмнија на 3-3, замолкнувајќи го Брисел.
Во последните моменти, Белгија повторно се разбуди. Лукаку накратко ги врати во водство, но ВАР го поништи голот. Сепак, херојот на вечерта беше Кевин де Бруин, со прецизен удар во 88. минута ги донесе трите бода за Белгија и голема еуфорија на трибините.
Во меч од групата „И“, „аѕурите“ на домашен терен ја совладаа Молдавија со 2-0 и ја впишаа првата победа во квалификациите за Светското првенство 2026. Стрелци беа Распадори и Камбијасо, кои со своите голови му подарија победничко испраќање на селекторот Лучијано Спалети, за кого ова беше последен натпревар на клупата на Италија.
По разочарувачкиот старт и високиот пораз од Норвешка, Италијанците мораа да реагираат – и го сторија тоа. Победа која ги враќа во игра.
Во истата група, Норвешка ја продолжи победничката серија – овојпат минимално, но доволно. На гостувањето во Талин, Халанд со погодок во 62. минута донесе три нови бода (0-1) против Естонија. Тоа беше нивна четврта победа по ред, со што убедливо го држат врвот во групата.
Во групата „Л“, Хрватска направи шоу пред своите навивачи. Со убедливи 5:1 ја декласираа Чешка, испраќајќи јасна порака дека се апсолутен фаворит. Андреј Крамариќ двапати стрелаше, а Перишиќ, Модриќ и Будимир се погрижија да ја заокружат голеадата.
Тоа беше втора победа на „коцкестите“ во исто толку натпревари – совршен старт за избраниците на селекторот Златко Далиќ.
Во истиот сегмент, Фарските Острови направија мал пресврт во второто полувреме против Гибралтар – со два гола стигнаа до триумф од 2-1 и го впишаа првиот сет бодови во оваа фаза.
