Претседателот на УЕФА, Александeр Чеферин, откри дека постои можност завршницата од Лигата на шампионите да се игра по моделот на кошаркарската Евролига. Тоа значи дека би се организирал завршен фајналфор турнир.
УЕФА беше принудена да биде домаќин на такво финале во Лигата на шампионите пред две години поради пандемијата на коронавирусот.
„Не успеавме да преговараме поради пандемијата. Мислам дека тоа би било одлична работа. Тоа би било понеизвесно натпреварување и многу поинтересно за навивачите. Разговарав за тоа со дел од претседателите на клубовите, на пример ПСЖ, и тие се согласуваат. Европскиот фудбал е поголем од НФЛ – лигата, но Супербоул е огромен спектакл. Треба да решиме едноставна равенка – да им обезбедиме на клубовите компензација за парите што ќе ги загубат како домаќини во полуфиналето“, изјави Чеферин, најавувајќи голема револуција во иднина.
