Македонија одигра херојско реми (1-1) против Англија во Скопје за крај на квалификациите за ЕВРО 2024. Можеби можевме и повеќе, посебно на натпреварите против Украина, но бевме во групата со велесили како Англија и Италија, а и со двете не загубивме на домашен терен.
Капитенот Енис Барди, кој денеска беше стрелец на погодокот за Македонија, вели дека би сакал селекторот Милевски да остане на кормилото.
„Со селекторот Милевски направивме многу добри работи и во репрезентацијата до 21 година и сега во овој момент. Мислам дека се познаваме добро и дај Боже да продолжиме да соработуваме заедно. Не ги знам деталите од неговиот договор само знам дека го почитувам многу и имам голем респект за него“, изјави Барди.
Тој имаше коментар и за пеналот.
„Тргнав и застанав, а голманот остана во место. Тука загубив малку време и не сакав да гаѓам уште погоре. За среќа, ми се врати одбиената топка и успеав да дадам гол“, потенцираше Барди.
