Баерн Минхен останува без Мануел Нојер за клучниот реванш против Интер во четвртфиналето од ЛШ. Иако постоеше надеж дека капитенот ќе биде подготвен, повредата на потколеницата сè уште не е целосно санирана, па медицинскиот тим одлучи дека нема да се ризикува со негов настап.
Нојер сигурно ќе ги пропушти двата наредни натпревари — пресметката со Интер во Лигата на шампионите, како и дуелот со Хајденхајм во Бундеслигата. Целта е да се врати на време доколку Баерн избори место во полуфиналето од елитното европско натпреварување.
Овој развој на настаните е нов удар за тренерот Винсан Компани, кој веќе се соочува со сериозни проблеми поради долгиот список на повредени играчи. Покрај Нојер, надвор од комбинација се и Алфонсо Дејвис, Упамекано, Ито и Коман.
Баерн има заостанување од 1-2 од првиот меч во Минхен, па ќе мора да оди на победа на „Џузепе Меаца“ ако сака да остане во трката за трофејот во Лигата на шампионите.
