Арда Гулер, најталентираниот турски фудбалер, од Фенербахче се пресели во Реал Мадрид, но сега изгледа дека би можел да го напушти главниот град на Шпанија и да ја продолжи кариерата во Германија.
Иако зимскиот трансфер период само што заврши, големите клубови веќе ги подготвуваат своите листи на желби за летото, а за него се интересира Баерн Минхен. Баварскиот гигант се надева дека ќе успее да го доведе 20-годишниот турски репрезентативец Арда Гулер со перманентен трансфер.
Според информациите, Баерн е решен да понуди 50 милиони евра за услугите на младиот турски фудбалер. Овој трансфер совршено би се вклопил во офанзивната линија што ја форсира тренерот Винсент Компани. Баерн игра во формацијата 4-2-3-1, а Гулер би можел да формира напаѓачко трио заедно со Џамал Мусијала (21) и Мајкл Олисе (23), зад напаѓачот Хари Кејн (31).
Оваа сезона, Арда Гулер немаше многу можности да игра под раководство на Карло Анчелоти во Реал Мадрид, што го разочара турскиот интернационалец. Тој побара од клубот да оди на позајмица до крајот на сезоната, а сега изгледа дека би можел и трајно да го напушти шпанскиот клуб.
Според информациите, Реал Мадрид би бил подготвен да прифати понуда за трансфер на Гулер, а се очекува дека понудата од 50 милиони евра ќе биде доволна за негова преселба во Баерн Минхен.
Досега, Арда Гулер настапи за Реал Мадрид на 40 натпревари, постигна девет голови и имаше пет асистенции.
