Атлетико Мадрид приреди сензација во дербито против Барселона, славејќи со 1-2 благодарение на спектакуларен пресврт во второто полувреме. Овој триумф е прв за тренерот Диего Симеоне на гостински терен против каталонскиот тим и значаен чекор во продолжување на импресивната серија од 12 победи по ред.
Херој на натпреварот беше Александер Сорлот, кој во драматичната 96-та минута го постигна победничкиот гол, носејќи им три бода на „јорганџиите“.
Првото полувреме помина во знакот на Барселона, која го отвори резултатот преку Педри во 30. минута. Тој вешто ја искористи можноста во шеснаесетникот и го совлада Јан Облак за водство на домаќините.
Во второто полувреме, Атлетико Мадрид дојде до егал. Родриго де Пол го израмни резултатот во 60. минута, што ја разбуди екипата на Симеоне за уште поголема борба, која кулминираше со триумфот на крајот.
