Менаџерот на Арсенал, Микел Артета, продолжува да верува дека неговиот тим може да се бори за титулата во Премиер – лигата, иако моментално заостанува со 11 бода зад Ливерпул, кој има еден натпревар повеќе. Шпанецот увери дека „топчиите“ ќе се борат, додека имаат математички шанси за првото место.
„Тимот да се откаже од борбата за титулата? Само преку мене мртов. Ако не верувам, ќе се вратам дома. Математички сè уште е можно. Мора да играме во секој натпревар. Пред три дена одеднаш можевме да ја намалиме разликата. Сега оваа задача е потешка, но ако сакаш да ја освоиш Премиер – лигата, мора да направиш нешто специјално. Ако сакаме да ја освојуваме лигата под овие услови, веројатно мора да направиме нешто што никој друг не го направил во историјата на Премиер – лигата“, изјави Артета.
Утре Арсенал има нов предизвик, кога во вонредното коло ќе гостува кај Нотингем Форест.
„Нуно Еспирито Санто прави неверојатни работи. Не само во Нотингем Форест, туку и во Волвс беше така. Тој, тренерскиот штаб и клубот треба да бидат горди. Она што го направија откако се вратија во Премиер – лигата е лесно забележително“, коментира Артета.
Во однос на состојбата со играчите, Артета додаде дека Букајо Сака и Габриел Мартинели се враќаат полека, но сѐ уште не се подготвени за игра. Итан Нуанери имал само грчеви и ќе биде подготвен за настап.
