Шкупи го декласира Скопје со 4-1 на стадионот „Борис Трајковски“ и со десет освоени бода се искачи на првата позиција на табелата во Првата лига. Стрелци на головите беа Марјан Радески, Валид Хамиди, а двапати стрелаше и новото засилување Сандеј Адетунџи.
Играчот за врска, Али Адем, смета дека Шкупи заслужено дојде до триумфот.
„Одигравме одличен натпревар како тим и ги заслуживме трите бода. Во првиот дел создадовме многу шанси, а само еднаш погодивме. Но, потоа се отвори на стартот на второто полувреме и го решивме мечот. Апсолутно ја заслуживме победата“, изјави Адем.
По репрезентативната пауза, Шкупи ќе гостува во Тетово на дерби против Шкендија.
