Германскиот фудбалски клуб Ајнтрахт Франкфурт го раскина договорот со „Касперски“, руска компанија специјализирана за сајбер безбедност, потврдија од клубот.
Ајнтрахт соопшти дека го раскина договорот по препораките на германската влада.
Германскиот клуб кој настапува во Бундеслигата објави дека Федералната канцеларија за безбедност на информатичката технологија (БСИ) го предупредила за доверливоста на рускиот производител на антивируси.
„Нашата доверба во производите и услугите на Kaspersky во обезбедувањето заштита навистина се промени. Го информиравме Kaspersky дека веднаш го раскинуваме спонзорскиот договор“, изјави портпаролот на Ајнтрахт.
Ајнтрахт, кој првично го прекина партнерството со руската компанија, контактираше со БСИ по руската инвазија на Украина за да добие препораки за понатамошни чекори.
По руската инвазија на Украина, Шалке го раскина договорот со долгогодишниот спонзор, руски „Газпром“.
