Македонскиот првак Струга Трим Лум утревечер (21 часот) во Подгорица го игра реванш мечот против Будуќност во втората квалификациска рунда од Конференциската лига.
Тренерот Шпетим Дуро очекува добар настап на својот тим и пласман во следното коло од ова европско натпреварување.
„Со нетрпение го очекуваме утрешниот натпревар со Будуќност, очекувам тимот да има добар настап, исто како што тоа го направивме на трите досегашни средби во Европа, двата против Жалгирис и последниот против Будуќност. Резултатот од првиот меч е позитивен, бидејќи успеавме да победиме, но ова е нов натпревар и треба да бидеме максимално подготвени. Верувам дека можеме да излеземе како конечни победници“, изјави Дуро.
