Шпанските судии се подготвени да штрајкуваат и со тоа да го прекинат натпреварувањето во Ла Лига. Одлуката сѐ уште не е официјална, треба да биде донесена во текот на денот, а судиите се подготвени на радикален потег по серијата вербални и физички напади кои ги претрпеа неодамна.
Судијата Антонио Позо беше физички нападнат на натпреварот меѓу екипите на Пољас и на Калавера до 19 години. Тој беше соборен на земја и удрен со тупаница додека лежеше. Наводно, во нападот учествувал и таткото на еден од играчите.
Шпанската фудбалска федерација го осуди нападот и повика на акција за промени, што имплицираше дека јавниот дискурс за судиите придонел за насилството.
Само ден потоа директорот на Валенсија, Хавиер Солис, луто и огорчено го продолжи негативниот тренд. Тоа се случи по поразот на неговиот тим од Севилја кога тој го опиша судењето како „срамно“, „грабеж во забавена снимка“ и „срам напишан со големи букви“. За тоа најверојатно ќе биде казнет.
Како резултат на овие реакции, кои се само дел од кампањата за која судиите во Шпанија тврдат дека се води против нив, се подготвува штрајк на судиите.
