Капитенот на аргентинската репрезентација Лионел Меси е поканет уште еднаш да се „овековечи“ на Маракана оставајќи стапалки на легендарниот бразилски стадион, соопшти во вторникот државното тело за заштита на спортот на Рио де Жанеиро.
Аргентина ја победи Франција на драматичен начин со 4-2 на пенали во финалето на Светското првенство во 2022 година, а поканата за Меси, која првпат беше упатена во 2021 година, повторно е упатена.
„Меси веќе ја покажа својата важност на теренот и надвор од него. Тој е фудбалер на највисоко ниво во историјата на спортот. Тој е на ова ниво со години. Ништо не би му одговарало повеќе од тоа да ја добие оваа чест. Меси е генијалец со топката“, изјави Адријано Сантос, шеф на Државната спортска управа во Рио де Жанеиро.
Стадионот „Маракана“ беше домаќин на финалето на Светското првенство во 1950 и во 2014 година. Пред речиси 18 месеци, Аргентина и Лионел Меси ја освоија Копа Америка на легендарниот стадион.
Отпечатоците на Меси на патеката на славната „Маракана“ можат да застанат покрај оние на легендите Пеле, Гаринча, Ривелињо, Роналдо, Еузебио, Себастијан Абреу и Франц Бекенбауер.
