Селекторот на српската фудбалска репрезентација Драган Стојковиќ изјави дека неговата селекција ја очекува тешка група на Светското првенство во Катар. „Орлите“ ќе го отворат турнирот против Бразил, а потоа следуваат натпреварите со Камерун и со Швајцарија.
„Тешка група, имаме ривали кои мораме да ги почитуваме, но пред се треба да се почитуваме себеси. Ни претстои мини турнир, три натпревари кои треба да ги одиграме на највисоко ниво. Во секој случај, тешка група , но не се плашиме, сакаме предизвик и мислам дека ќе успееме. Многу сум среќен што ќе играм против Бразил. Кој и да дојде на стадион ќе ужива.
Сите селекции се квалитетни, сите се силни, моќни, имаат свој потенцијал, но тука е и Србија. Значи, ќе видиме. Сакаме пласман во нокаут фазата. Како што ги одработивме квалификациите на одличен начин, така мораме да бидеме подготвени за овој мини турнир. Имаме наша цел и ќе направиме се за да дојдеме до неа, без разлика на името на ривалите“, изјави селекторот на Србија, Драган Стојковиќ.
Тој претходно во текот на денот истакна дека Србија нема да дојде во Катар да се сонча и да ги посетува плажите, но по ждребот е свесен дека работата ќе биде се освен лесна.
