Нигерискиот фудбалер и играч на Лестер, Вилфред Ндиди, ќе го пропушти остатокот од сезоната поради повреда на коленото со која се здоби на натпреварот против Рен во Конференциската лига на УЕФА, соопшти денеска менаџерот Брендан Роџерс.
Поради споменатата повреда, нигерискиот репрезентативец ги пропушти квалификациските натпревари за СП 2022, во кои неговата репрезентација загуби од Гана.
Роџерс објави дека Ндиди бил опериран и дека неговото враќање на тренинзите се очекува во јуни.
„Штета е за нас, но тој ќе биде подготвен за следната сезона. Откако сум тука, тој беше брилијантен за тимот. Повредата беше незгодна, па му требаше операција и сега ќе се опоравува до јуни“, изјави Роџерс.
Ндиди пристигна во Лестер во јануари 2017 година од белгиски Генк, а оваа сезона одигра 31 натпревар за „лисиците“ во сите натпреварувања.
