Тренерот Феликс Магат е позитивен на коронавирус и нема да ја води Херта на мечот од Бундеслигата против Хофенхајм в сабота, потврдија од клубот од Берлин.
68-годишниот Магат ја презеде Херта минатата недела, заменувајќи го Тајфун Коркут.
„Нашиот тренер даде позитивен тест за Ковид-19. Во моментов е јасно дека нема да ги води тренинзите и натпреварите на тимот. Неговата состојба е нормална и нема никакви симптоми“, соопшти Херта.
Тимот од Берлин е на 17. место на табелата во германскиот шампионат и ќе се бори за опстанок во елитата.
Феликс Магат е третиот тренер на чело на Херта оваа сезона.
