Богатите сопственици на Њукасл се решени да го задржат клубот во Премиер – лигата оваа сезона, па затоа во јануари ќе започнат со сериозни засилувања. Како опции за нападот на „чавките“ се споменуваат Антони Марсијал и Един Џеко.
Њукасл, кој неодамна доби нови и исклучително богати сопственици од Саудиска Арабија, моментно е на претпоследното место во англиската Премиер – лига, но со ист број бодови како последнопласираниот Норич. Иако заостануваат само три бода зад сигурната зона, од коло во коло Њукасл игра се послабо.
Затоа челниците на клубот решија да реагираат во јануари, а нивна прва цел е напаѓачот на Манчестер Јунајтед, Антони Марсијал. Французинот имаше многу проблеми оваа сезона бидејќи не успеа да ја фати вистинската форма по повредата која ја прекина неговата последна сезона.
Сепак, посигурна опција е напаѓачот на Интер, Един Џеко, кој остави длабока трага во англискиот фудбал и веќе ги докажа своите квалитети со 50 гола и 24 асистенции во дресот на Манчестер Сити. Џеко и годинава е во одлична форма, а за Интер веќе има постигнато 11 гола.
За десет дена започнува зимскиот преоден рок, а секако ќе биде интересно да се проследат активностите на Њукасл кој со новите сопственици располага со огромен буџет.
