Селекторот на фудбалската репрезентација на Романија, Мирел Радои, одлучи да повика 15-годишно момче во најдобриот национален тим за дуелите со Исланд и со Лихтенштајн во ноември во квалификациите за Светското првенство во Катар. Се работи за Енес Сали, голем талент кој би можел да дебитира неверојатно брзо за романскиот национален тим.
Сали е роден во Канада, но неговите родители се Турци кои се родени и израснати во Романија, што му дава можност да игра за романската репрезентација. Тој ги имал фудбалските почетоци во канадски фудбалски тим, потоа беше дел од академијата на Барселона, а од летово е член на романски Фарул, каде дојде од академијата на познатиот романски поранешен фудбалер Георге Хаги.
Реткост е да се види 15-годишно момче во сениорскиот фудбал, а уште повеќе да добие покана за настап во А-репрезентација на квалификациски натпревари.
