Актуелниот првак Шкендија и понатаму е без победа во првенството. По три кола ефектот е два освоени бода, а триумфот им побегна за малку во Штип, откако Брегалница во судиското продолжение постигна гол за израмнување.
Тренерот Бруно Акраповиќ вели дека тимот работи добро, дека Шкендија имала доминација на дуелот против Брегалница, а домаќинот буквално трипати го поминал центарот и постигнал три гола.
„Некогаш треба да се има и малку повеќе среќа. Имавме игра, доминација на мечот во Штип, создадовме шанси, имаше голови, но, сепак, не стигнавме до победа. Брегалница трипати го помина центарот и ни даде три гола. Сепак, верувам во фудбалерите, ќе дојдат и и победите. Според прикажаните игри, требаше да имаме девет освоени бода, но не оди се така лесно во фудбалот“, изјави Бруно Акраповиќ по ремито (3-3) против Брегалница во Штип.
