Селекторот на фудбалската репрезентација на Франција, Дидие Дешамп, до следниот вторник треба да го објави прелиминарниот список на фудбалери кои ќе конкурираат за настап на Европското првенство. Според него, не треба да се очекуваат никакви изненадувања на списокот.
Француската јавност бара изненадувањето да биде Карим Бензема и некои други играчи на кои не се потпирал досега. Сепак, тоа нема да се случи.
„Јас не сум Дедо Мраз и не сум тука за да објавам изненадувања. Го финиширам списокот, има некои играчи кои сè уште се опоравуваат како Корентин Толисо, и јас ги немам сите потребни информации за нивната здравствена состојба. Списокот на фудбалери ќе го објавам во вторник, но бидејќи натпреварите сè уште се играат и по тој датум, мора да се надеваме дека сè ќе биде в ред на здравствен план. Единствениот список што ќе важи е тој што ќе го испратиме до УЕФА до 1 јуни на полноќ “, вели Дешамп.
Карим Бензема последниот натпревар за репрезентацијата на Франција го одигра во 2015 година, а беше исфрлен од националниот тим поради афера со уценувањето на Матије Валбуена. Станува збор за случај стар шест години во кој напаѓачот на Реал Мадрид е осомничен дека бил дел од група која од Валбуена побарала 150.000 евра за да не ги објави снимките од неговата сексуална врска со непознато лице. Затоа ќе мора да се појави и на суд во октомври. Доколку биде осуден, Бензема би можел да се соочи со затворска казна од пет години.
