Mенаџерот на Ливерпул, Арне Слот, изјави дека ја презема целата одговорност за кризата во која се наоѓа неговиот тим, откако „црвените“ доживеаја понижувачки пораз од 0-3 од Нотингам Форест на „Енфилд“ во натпревар од 12. коло во Премиер – лигата. Ова беше шести пораз за Ливерпул во последните седум првенствени дуели. Лошата серија го спушти тимот на 11. место на табелата и отвори сериозни прашања околу моменталната состојба на актуелниот англиски шампион.
Поразот претставува и историски негативен рекорд, бидејќи за првпат од април 1965 година Ливерпул губи два последовни првенствени натпревари со разлика од три или повеќе гола (претходно 0-3 од Манчестер Сити пред репрезентативната пауза).
„Моја е одговорноста дали ќе победиме или ќе загубиме. Но, она што го гледам е тим кој продолжува да се бори до крај, а и навивачите, кои, патем, останаа до последно да ги поддржат играчите“, изјави Слот по натпреварот, нагласувајќи дека Ливерпул е во циклус во кој ги промашува своите шанси, а противникот ја казнува речиси секоја грешка.
„Последно време постојано ги промашуваме шансите, а оние кои ги дозволуваме завршуваат во нашата мрежа. Тоа нема да трае цела сезона. Но, ни треба момент на енергија – да дадеме први гол, да поведеме со 1-0 кога играме добро. Се случи спротивното, бидејќи Форест доби голем енергетски поттик од голот што го постигна“.
Слот призна дека ситуацијата е тешка:
„Гледам многу работи поради кои во нормални услови резултатот би бил поинаков, но сега сме во сложена ситуација.“
На прашањето дали верува дека може да го прекине падот на тимот, тој беше категоричен:
„Да, секако дека има излез, особено со квалитетните играчи што ги имаме.“
Сепак, нагласи дека критиките треба да започнат од него.
„Нема разлика дали победуваш или губиш – секогаш се навраќаш на составот што си го поставил и на измените, и се прашуваш: ‘Каде можевме подобро? Каде можевме да се приспособиме?’ Се обидов да поправам неколку работи што не функционираа најдобро. Имаме квалитетни играчи. Мојата работа е да го извлечам најдоброто од нив. Во моментов тоа не го правам. Тоа е моја одговорност. Но, тоа е различно од тоа да се сомневаш во себе. Сакам уште еднаш да истакнам дека јас сум одговорен за тековните порази.“
Слот одби да бара оправдувања во судењето.
„Ти си одговорен кога победуваш, но и кога губиш. Затоа претпочитам да не зборувам за судиските одлуки. Никогаш нема да најдам доволно оправдувања за резултатите што ги имаме. Далеку е од доволно добро. Јас сум одговорен за тоа.“
Тренерот беше разочаран од непостојаноста на тимот и од неможноста да го искористи силниот старт на натпреварот.
„Да играш дома и да загубиш со 0-3 е многу лош резултат, без разлика против кого играш. Неочекувано е, ако го погледнете првите триесет минути – имавме одличен старт. Не сум нè видел оваа сезона да создадеме толку многу шанси во тој период.“
Првиот гол на Муриљо точно пред паузата целосно го смени текот на натпреварот. Потоа Никола Савона и Морган Гибс-Вајт го докрајчија Ливерпул во второто полувреме.
„Првиот пат кога влегоа во нашиот шеснаесетник – дадоа гол. Горчлив коктел е да ги промашуваш своите шанси, а речиси секоја противничка да завршува во мрежата. Никој не сака да ме слуша како зборувам за судиски одлуки кога си загубил 0-3 од Форест.“
