Комо продолжува да блеска во Серија A. Тимот од Ломбардија запиша петти натпревар по ред без пораз, а денеска го шокираше Јувентус со победа од 2-0 на домашен терен. Со овој триумф, избраниците на Дани Хуиндос, кој го замени суспендираниот Цеск Фабрегас на клупата, не само што и го нанесоа првиот пораз на „старата дама“ сезонава, туку и го прескокнаа гигантот од Торино на табелата.
Главна ѕвезда беше младата аргентинска сензација Нико Паз.
Само 21-годишен, Паз најпрво запиша асистенција за водството на Кемпф уште во четвртата минута, а потоа во 79. со маестрален удар од десната страна ја потврди победата на својата екипа.
Со овој успех, Комо се искачи на петтото место во Серија А, додека Јувентус има многу да поправи пред претстојниот дерби дуел со Лацио.
