Тренерот на Барселона, Ханси Флик, ќе го пропушти претстојното „Ел Класико“ против Реал Мадрид, откако беше исклучен поради несоодветно однесување на мечот со Џирона (2-1). Германецот доби црвен картон во судиското продолжение, а дополнително го налути дисциплинското тело на Ла Лига со неприличен гест кон судијата, што сигурно ќе резултира со сериозна казна.
Инцидентот се случи во завршницата на натпреварот, кога Флик бурно реагираше на одлуката на судијата Хесус Хил Мансано да додаде само четири минути надополнување, иако во второто полувреме имаше бројни прекини. Тренерот прво доби втор жолт, а потоа и црвен картон.
По победничкиот гол на Роналд Араухо во 93. минута, камерите го уловија Флик како слави бурно, правејќи навредлив гест кон судијата – потег кој не остана незабележан.
Последиците пристигнаа брзо: Дисциплинската комисија на Ла Лига го суспендираше Флик за наредниот натпревар, што значи дека Барселона ќе влезе во „Ел Класико“ без својот стратег на клупата. Дополнително, Германецот треба да добие казна и за својата скандалозна прослава на голот.
