Барселона и Пари Сен Жермен ќе се соочат еден против друг во спектакуларен дуел од второто коло на групната фаза во Лигата на шампионите. Натпреварот ќе се одигра на стадионот „Луис Компанис“ од 21 часот, а главен судија ќе биде искусниот англиски арбитар Мајкл Оливер. Оваа средба претставува повторување на неколку незаборавни дуели меѓу двата гиганти во последните години и ветува врвен фудбалски спектакл.
Актуелниот освојувач на трофејот, Пари Сен Жермен, го започна учеството во годинешното издание на турнирот повеќе од убедливо. Французите ја декласираа Аталанта со 4-0 и јасно покажаа дека повторно ќе бидат еден од главните фактори во Лигата и ќе се обидат да ја одбранат титулата.
Барселона исто така стартуваше со победа и има 3 бода. Каталонците славеа со 1-2 на гостувањето кај Њукасл, при што покажаа одредени слабости, но и тие имаат големи амбиции во натпреварувањето и се очекува во текот на сезоната да го кренат нивото на својата игра. А што би бил подобар момент за тоа ако не дуелот со ПСЖ.
Барселона демонстрира одлична форма со пет последовни победи во сите натпреварувања. Каталонците на 28 септември во Ла Лига го совладаа Реал Сосиедад со 2-1, на 25 септември како гости го победија Овиедо со 1-3, а на 21 септември го декласираа Хетафе со 3-0. Во првиот натпревар од Лигата на шампионите годинава, Барса го совлада Њукасл со 1-2 на 18 септември, а пред тоа на 14 септември и нанесе тежок пораз на Валенсија со 6-0.
Пари Сен Жермен исто така е во одлична форма со четири победи во последните пет средби. Парижаните на 27 септември го победија Оксер со 2-0, иако претходно, на 22 септември, беа поразени од Марсеј со 0-1. Во првиот натпревар од Лигата на шампионите, ПСЖ ја декласира Аталанта со 4-0 на 17 септември, а претходно славеше и над Ленс (2-0 на 14 септември) и Тулуз (6-3 на 30 август).
Историјата на меѓусебните дуели меѓу Барселона и Пари Сен Жермен е исполнета со драматични моменти. Последната нивна средба се одигра на 16 април 2024 година, кога ПСЖ ја порази Барса со 1-4 во четвртфиналето на Лигата на шампионите. Рафиња го отвори резултатот за домаќините, но Дембеле, Витиња и Мбапе со два гола (еден од пенал) ја донесоа победата на парижаните. Недела претходно, на 10 април, Барселона славеше со 2-3 на „Паркот де принцовите“ со два гола на Рафиња и еден на Кристенсен.
Историјата го памети и легендарниот натпревар од 8 март 2017 година, кога Барселона направи неверојатен пресврт, победувајќи со 6-1 и елиминирајќи го ПСЖ по поразот со 0-4 во првиот натпревар.
Во последните пет меѓусебни дуели, Барселона има две победи, ПСЖ исто така има две, а еден меч завршил без победник.
