Галатасарај се подготвува за исклучително тежок дуел против Ливерпул во Лигата на шампионите. Средбата ќе се игра утревечер во Истанбул.
Тренерот на тимот од Босфорот, Окан Бурук, нагласи дека тимот ќе остане верен на својот стил на игра.
„Ќе играме и ќе размислуваме како Галатасарај“, изјави Бурук. „Ова е еден од оние натпревари во кои мораме да вршиме притисок и да го ставиме противникот под голем притисок. Игравме многу такви мечеви, но овој против Ливерпул ќе биде еден од најтешките од моето доаѓање. Се соочуваме со тим со многу успешен тренер. Сакаме да излеземе на терен со нашите планови и да дадеме максимум“, изјави Окан Бурук.
На прес-конференцијата, Бурук зборуваше и за физичката подготовка на Виктор Осимен.
„Тој продолжува да тренира. Ќе видиме како ќе се чувствува на денешниот тренинг и потоа ќе донесеме одлука. Секако, беше позитивно што успеа да одигра десет минути во последниот натпревар.“
Турскиот стратег се осврна и на Жозе Мурињо, потсетувајќи се на инцидент од минатата сезона, по победата на Галатасарај со 2-1 над Фенербахче во четвртфиналето на Купот на Турција, кога португалскиот тренер го фати за носот.
„Тогаш паднав на земја, малку претерав“, призна Бурук. „Не очекував такво нешто од него. Кога натпреварот заврши, одев да ги поздравам судиите, а Мурињо дојде кон мене. Обично си се ракуваме по натпреварот. Кога потпиша со Фенербахче, почна да зборува премногу – го познаваме неговиот стил. Тој не игра само на теренот, туку се обидува тоа да го прави и надвор од него. Но, ние бевме подобри – јас бев подобар од него. Освоивме шампионат против него и го победивме двапати на неговиот стадион. За жал, оваа година тој нема да биде тука, се надевавме да се сретнеме уште двапати“, истакна тренерот на Галатасарај.
