Жозе Мурињо повторно ќе инкасира милионска отштета по новиот отказ, овојпат од Фенербахче. Турскиот клуб му врачи отказ на португалскиот стратег по само шест натпревари сезонава, а пресуден беше поразот од Бенфика кој ги елиминираше „жолтите“ од квалификациите за Лигата на шампионите.
Мурињо имаше уште една година од договорот, па ќе наплати 8,9 милиони евра како обесштетување. Со оваа исплата, неговата вкупна заработка само од откази достигна речиси неверојатни 102,78 милиони евра.
Португалецот одамна важи за „крал на отштетите“ во светот на фудбалот. За споредба, Антонио Конте во целата кариера инкасирал околу 43 милиони евра, од кои најголемиот дел – 30 милиони – од Челси во 2018 година. Лондонскиот клуб бил великодушен и кон други тренери: Сколари добил 15,7 милиони евра во 2009 година, а Томас Тухел 15 милиони фунти во 2022 година.
Исплати на Мурињо по откази:
- Челзи (прв) – 20,88 милиони €
- Реал Мадрид – 19,72 милиони €
- Челзи (втор) – 9,63 милиони €
- Манчестер Јунајтед – 22,74 милиони €
- Тотенхем – 17,40 милиони €
- Рома – 3,48 милиони €
- Фенербахче – 8,93 милиони €
