Виктор Ѓокереш останува во својата татковина Шведска и нема да патува со Арсенал на азиската турнеја на „топчиите“. Англискиот клуб сè уште нема стапено во контакт со Спортинг, а без нова понуда што ќе ги задоволи барањата на „лавовите“, 27-годишниот напаѓач нема дозвола да патува за Лондон за да им се приклучи на новите соиграчи, кои денес заминуваат за Сингапур.
Во денот кога Арсенал го објави трансферот на Нони Мадуеке од Челси, од клубот не дадоа никаков знак дека преговорите за Ѓокереш продолжуваат. Од понеделникот (14 јули), кога беше испратена последната понуда до Спортинг, „топчиите“ не воспоставиле никаков нов контакт со португалскиот клуб, дури ни во последните часови.
Спортинг бара 80 милиони евра за Ѓокереш и засега не е подготвен да попушти ниту за цент. Арсенал понудил 63,5 милиони евра, плус 10 милиони во бонуси, а агентот на фудбалерот, Хасан Четинкаја, се откажал од провизијата од околу 7 милиони евра. Сепак, сè се сведува на променливите клаузули во договорот, поврзани со настапите на играчот. Лисабонскиот клуб инсистира тие да бидат реалистични и лесно достижни. Некои, како на пример 20 одиграни натпревари за бонус од 2,5 милиони евра, се прифатливи, но други не ги задоволуваат стандардите на Спортинг Лисабон.
Во меѓувреме, играчот со број „9“ е под дисциплинска мерка од страна на „зелено-белите“. Тој е отсутен од тренинзите од саботата кога тимот замина на подготовките во Лагос и веќе има седумдневно отсуство. Се шпекулира дека со акумулирани десет дена неоправдано отсуство клубот може да го отпушти. Но, таквото сценарио е малку веројатно, бидејќи би му овозможило на Арсенал да го ангажира како слободен агент, а Спортинг во тој случај би останал без никаква компензација.
Се очекува Арсенал наскоро повторно да воспостави контакт со Спортинг. Освен бонусите, треба да се решат и прашањата околу роковите за исплата и механизмот за солидарност – т.н. надомест за обука, кој треба да се исплати на клубовите каде што фудбалерот играл во младите категории.
Во однос на механизмот за солидарност, обично плаќа клубот кој ја добива трансферната сума, но во овој случај „зелено-белите“ бараат трошоците да се поделат 50/50. Кога станува збор за исплатата, Арсенал сака да ја плати на повеќе рати, додека Спортинг бара трансферот да биде исплатен во две рати.
