Саудискиот гигант Ал-Хилал не отстапува од намерата да го донесе напаѓачот на Наполи, Виктор Осимен, како своја главна летна аквизиција. Според најновите извештаи од Италија, клубот од Ријад ја зголемил понудата до 160 милиони евра за четиригодишен договор, што значи заработка од 40 милиони евра по сезона за нигерискиот репрезентативец.
Дополнително, Ал-Хилал е единствениот клуб кој е подготвен целосно да ја активира откупната клаузула од 75 милиони евра, која е наведена во договорот на Осимен со Наполи.
Интерес за напаѓачот покажуваат и неколку европски гиганти, меѓу кои Јувентус и Манчестер јунајтед, но тие се надеваат дека ќе успеат да преговараат за пониска цена или алтернативни услови за плаќање.
И покрај енормната финансиска понуда, Осимен веќе одбил најмалку две претходни понуди од клубови од Саудиска Арабија. Неговиот приоритет останува натпреварување во Европа и настапување на највисоко ниво.
Иднината на напаѓачот сè уште е неизвесна, но се чини дека ќе зависи од тоа дали Осимен ќе се реши за финансиска стабилност или ќе продолжи да ги следи своите спортски амбиции на европска сцена.
