Манчестер Јунајтед покажува сериозен интерес за ангажман на францускиот репрезентативец Кристофер Нкунку, пренесува угледниот француски весник „Л’Екип“. Според информациите, клубот од „Олд Трафорд“ веќе започнал прелиминарни разговори со агентите на играчот за можен трансфер ова лето.
Нкунку, кој во Челси пристигна во 2023 година од Лајпциг, изразил желба да го напушти клубот од Лондон. Во минатата сезона 27-годишниот офанзивен играч одигра 27 натпревари во Премиер – лигата и постигна три гола, но не успеа целосно да го оправда очекуваниот потенцијал, најмногу поради проблеми со повреди.
Французинот, кој ја започна кариерата во Пари Сен Жермен, има 14 настапи и еден погодок за националниот тим на Франција, дебитирајќи во март 2022 година.
Манчестер Јунајтед се очекува да биде активен на летниот трансфер пазар, особено по неуспешната сезона во која клубот не успеа да освои ниту еден трофеј. Потенцијалното доаѓање на Нкунку се гледа како дел од поширокиот план за реконструкција на тимот.
