Македонскиот шампион Шкендија ја пополни една од клучните позиции со ангажман на интернационалецот Бабукар Гаје – стандарден голман на селекцијата на Гамбија. Станува збор за искусен 27-годишен чувар на мрежата, роден во Германија, кој има зад себе солидна кариера и европско искуство.
Гаје фудбалскиот пат го започнал во младинските категории на Билефелд, а потоа бранел за екипите на Арминија Билефелд, вториот тим на Штутгарт и Кобленц. Преку своето германско државјанство и школување, тој носи со себе и дел од квалитетната германска голманска традиција.
Иако роден во Европа, Бабукар одлучи да ја претставува родната Гамбија и е веќе неколку години дел од националниот тим, каде што има запишано настапи и на престижниот Африкански куп на нации.
Минатата сезона ја мина во редовите на Воска Спорт, додека пред тоа бранеше за Локомотив Софија во Бугарија. Сега пред него е нов предизвик – да го засили голот на Шкендија и да помогне во борбата за трофеи на домашната и меѓународната сцена.
