Португалија е новиот освојувач на Лигата на нациите! Избраниците на Роберто Мартинез по голема драма на „Алијанц Арена“ во Минхен славеа над Шпанија по изведување на пенали (5-3), откако натпреварот заврши 2-2 по регуларните 90 минути и продолженијата.
Клучен момент беше одбранетиот пенал на Алваро Мората. Диого Кошта одлично го прочита и го скроти неговиот удар од белата точка во четвртата серија.
Дуелот започна отворено, со шанси на двете страни. Шпанија поведе во 21. минута преку Мартин Зубименди, но радоста траеше само пет минути – Нуно Мендеш врати со прецизен удар и израмни на 1-1. До крајот на првото полувреме Шпанците го преземаа ритамот и со погодок на Микел Ојарзабал во 45. минута заминаа на пауза со предност од 2-1.
Во второто полувреме Мартинез веднаш реагираше со замени, а израмнувањето дојде во 61. минута преку ветеранот Кристијано Роналдо. Мендеш фантастично проби по левата страна, топката се одби до капитенот, кој рутински погоди за 2-2.
Во продолженијата, двете селекции имаа свои моменти, но без конечен погодок. Португалија делуваше поопасно во првото, а Шпанија во второто продолжение. Сепак, сè се решаваше од белата точка.
Головите ги постигнаа Рамош, Витиња, Фернандеш, Мендеш и на крајот Рубен Невеш, кој ја реализираше победничката пенал-серија. Клучен момент беше одбраната на Диого Кошта при ударот на Алваро Мората, што го отвори патот до трофејот за Португалците.
Со ова, Португалија ја симна Шпанија од тронот и по вторпат во историјата го освои престижното натпреварување, по првата титула во 2019 година.
