Италијанскиот стручњак Симоне Инзаги е новиот тренер на саудискиот гигант Ал-Хилал. Тој потпиша двегодишен договор со клубот од Саудиската професионална лига и ќе ја започне својата нова авантура на претстојното Светско клупско првенство.
Инзаги доаѓа во Ал-Хилал по успешна четиригодишна етапа во Интер, каде што освои една титула во Серија А, два Купа на Италија, три Суперкупа и стигна до две финалиња во Лигата на шампионите. Според информациите на италијанските медиуми, Инзаги ќе биде најплатениот тренер во светот со годишна плата од околу 30 милиони евра, вклучително и бонуси.
Ал-Хилал неговото пристигнување го проследи со промотивно видео објавено на социјалните мрежи, во кое Инзаги е претставен како „италијански гениј“. Видеото било снимано во хотел во Париз, а во него кратко се најавува почетокот на новата ера за клубот.
Првиот предизвик за Инзаги ќе биде настапот на Светското клупско првенство кое ќе се одржи во САД. Ал-Хилал ќе се соочи со Реал Мадрид на 18 јуни, со Салцбург на 23 јуни и со мексиканската екипа Пачука на 27 јуни.
