Во пресрет на полуфиналниот натпревар од Лигата на нации меѓу Португалија и Германија во Минхен, капитенот на Манчестер Јунајтед, Бруно Фернандеш, потврди дека ја одбил понудата од Ал-Хилал вредна околу 230 милиони евра, затоа што сака да игра фудбал на највисоко ниво.
„Претседателот на Ал-Хилал ме повика пред еден месец за да праша дали постои можност да дојдам. Ми требаше време да размислам за иднината. Разговарав со Рубен Аморим, кој ме одвраќаше од тоа. И клубот беше јасен – не сакаа да ме продадат освен ако јас не инсистирам“, изјави Фернандеш.
Иако финансиите биле импресивни – плата од околу 200 милиони долари – 30-годишниот Португалец одлучил дека е поважна неговата амбиција да остане во елитниот фудбал и да продолжи да настапува во врвни натпреварувања.
„Сакав да продолжам да играм на највисоко ниво. Уште чувствувам страст кон фудбалот. Оваа одлука ја донесовме како семејство, но крајниот збор беше мој“, објасни тој.
Фернандеш потврди и дека семејството било важно во процесот на одлучување, спомeнувајќи дека неговите деца се дружат со деца на фудбалери како Рубен Невеш и Жоао Кансело, кои се во Саудиска Арабија.
Со оваа одлука, Бруно Фернандеш испраќа јасна порака дека неговиот приоритет останува натпреварувачкиот предизвик, а не само финансиската добивка – нешто што сигурно ќе ги радува навивачите на Манчестер Јунајтед.
