Илјадници навивачи на Барселона ги преплавија улиците на градот за да им оддадат чест на своите миленици кои оваа сезона ги освоија Ла Лига, Купот на кралот и Суперкупот на Шпанија. Сепак, победничката еуфорија накратко беше засенета од инцидент со двајца фудбалери.
Парадата започна во 18 часот од стадионот на Барса, а отворениот автобус со играчите помина околу 15 километри низ најважните улици на градот, завршувајќи кај Триумфалната капија. Илјадници фанови пееја, скандираа и ги поздравуваа своите херои. Во 20:30 часот, прославата беше заокружена со спектакуларен огномет, по што автобусот се врати назад кон „Камп Ноу“.
Но, во еден момент, радоста беше накратко прекината – дефанзивецот Ињиго Мартинез изгуби рамнотежа и падна од автобусот. Според информациите кои брзо се проширија, со него паднал и неговиот соиграч Дани Олмо, што предизвика момент на загриженост кај присутните.
Среќна околност е што ниту еден од нив не се здобил со сериозни повреди. Публиката набрзо се смири, а атмосферата на улиците повторно стана весела и славеничка. Дополнителен сигнал дека сè е во ред беше моментот кога Ињиго Мартинез беше забележан како наздравува со пиво заедно со соиграчите, само неколку минути по инцидентот.
Барселона со тоа го заокружи историскиот успех со спектакл кој уште долго ќе се памети во Каталонија.
