Големото дерби на турскиот фудбал меѓу Галатасарај и Фенербахче не понуди спектакуларна игра на теренот и заврши без голови, но Жозе Мурињо се погрижи страстите да се разгорат до максимум. По завршувањето на натпреварот, португалскиот стратег го пофали судијата Славко Винчиќ и даде коментар што предизвика моментална реакција од управата на Галатасарај.
„Добивме добар натпревар, а заслугата е на судиите. Му благодарам на главниот судија затоа што судеше фер. Имаме 18-годишен играч (Јусуф Акчичек – н.з.), кој е иднината на турскиот фудбал, но се обидоа да направат сè за да добие картон уште на почетокот. Сепак, арбитарот ја контролираше ситуацијата, иако атмосферата беше напната. Во ситуацијата за која зборувам, на клупата на Галатасарај сите скокаа како мајмуни. Ако судијата беше Турчин, нашиот фудбалер ќе добиеше картон во првата минута, а во петтата веќе ќе требаше да го заменам“, изјави Мурињо на прес-конференцијата.
Од Галатасарај излегоа со официјална изјава во која го обвинија португалскиот стручњак за расизам и непочитување на турскиот народ.
„Од самиот почеток на својата работа во Турција, тренерот на Фенербахче, Жозе Мурињо, постојано дава срамни изјави за турскиот народ. Денес тој премина од неморални коментари кон нечовечка реторика. Официјално ја изразуваме нашата намера да побараме покренување на кривична постапка во врска со расистичките изјави на Жозе Мурињо, а исто така ќе поднесеме официјални жалби до ФИФА и УЕФА“, напишаа од Галатасарај.
Мурињо постојано тврди дека турските судии редовно го оштетуваат неговиот тим, поради што Фенербахче заостанува зад Галатасарај во борбата за титулата. За да се смири тензијата, Турската фудбалска федерација го ангажираше Винчиќ за вчерашниот натпревар.
„Во нормални услови сè уште би имале шанси за првото место. Ако турските судии ја видоа работата на арбитарот денес, секој од нив би требало да си каже: ‘Сакам и јас да судам фер, како што го направи тој’. Тогаш крајот на сезоната ќе биде многу возбудлив. Во спротивно, циркусот што го гледаме од почетокот на првенството ќе продолжи“, истакна „Специјалниот“.
„По натпреварот влегов во собата на судиите и му кажав на Винчиќ: ‘Благодарам што дојде и го судеше овој важен натпревар’. Таму беше и еден турски судија. Му реков: ‘Ако дербито беше доделено на турски судија, ќе беше комплетна катастрофа’. Тие сакаа да направат така што еден 18-годишен фудбалер да добие картон уште во првите минути. Тие се многу силни во валкани игри“, посочи Мурињо, мислејќи на управата на Галатасарај.
За самиот натпревар, Португалецот додаде: „Галатасарај добро се бранеше. Муслера ги спаси со неговите интервенции. Тие се задоволни од резултатот, а ние – не. Ако нашиот млад фудбалер направеше грешка, луѓето ќе ме ‘убиеја’ и мене и него. Колку удари кон гол имаа? Колку корнери? Мислам, ниту еден!“
Тренерот на Галатасарај, Окан Бурук, имаше сосема спротивно мислење за судењето на Винчиќ.
„Видовме колку лошо судеше арбитар кој го водеше последното финале во Лигата на шампионите. Раката му трепереше, додели премногу фаули и го прекинуваше темпото на игра. Не го слушаше четвртиот судија само затоа што беше Турчин. Ова е непочитување! Му кажав дека го водеше мечот полошо отколку што би го водел турски судија. Му трепереа и рацете и нозете. Многу сум незадоволен. Ангажираме судии од странство за големи пари, а тие само се обидуваат да го убијат темпото и да го истераат натпреварот до 0-0“, изјави гневниот тренер на Галатасарај.
